2025 оны 10 дугаар сарын 13-16-ны өдрүүдэд “Бүс ба Зам” их сургуулиудын Шинжлэх ухаан, технологийн хамтын ажиллагааны холбооны гишүүн бөгөөд ШУТИС-ийн проректор Р.Бадмаанямбуу тэргүүтэй төлөөлөгчид Бүгд Найрамдах Хятад Ардын Улсын Чунцин их сургуульд айлчиллаа.
Айлчлалын зорилго нь хамтын ажиллагааны санамж бичигт гарын үүсэг зурах, “Бүс ба Зам” хамтарсан лаборатори байгуулах, эрдэм шинжилгээ, инновацийн хамтын ажиллагааг өргөжүүлэх асуудал байв. 2025 оны 10-р сарын 14-ний өдөр Чунцин их сургуулийн дэд ерөнхийлөгч профессор Ли Жянь манай төлөөлөгчдийг хүлээн авч, тус их сургуулийн бүтээн байгуулалт, тэргүүлэх салбаруудын хөгжил, олон улсын хамтын ажиллагаа ба солилцооны туршлага тухай танилцууллаа. Уулзалтын явцад талууд салхины эрчим хүчийг үр ашигтай ашиглах, эрс тэс уур амьсгалын инженерчлэл, шинэ эрчим хүчний технологи, тогтвортой дэд бүтцийн судалгаа зэрэг чиглэлд хамтын судалгааг гүнзгийрүүлэх, нөөцийг хамтран ашиглах, харилцан нөхөх давуу талуудыг бий болгох чиглэлээр санал солилцов.
Энэ үеэр хоёр тал харилцан ойлголцлын санамж бичигт гарын үүсэг зурж, “Бүс ба Зам” хамтарсан лаборатори байгуулах тухай нэгдсэн ойлголтод хүрсэн юм.
Мөн айлчлалын хүрээнд эрдэм шинжилгээний хурал зохион байгууллаа. Хурлын явцад Чунцин их сургуулийн профессор Жан Сяомин, профессор Ли Ютун, судлаач Ли Тиан нар судалгааны явц, шинэлэг төслүүдийн завсрын үр дүнг тайлагнав.ШУТИС-ийн ЭХИС-ийн профессор Х.Сарангэрэл “Нарны эрчим хүч үйлдвэрлэхэд нөлөөлж буй үндсэн үзүүлэлтүүдийн шинжилгээ”, дэд профессор Э.Мөнхтуяа “Сэргээгдэх эрчим хүчний салбар, Монгол улсын судалгааны чиглэл ба бодлого” сэдвээр илтгэл тавьж, хөрш улсуудын эрдэмтэдтэй туршлага солилцов.
ШУТИС-ийн төлөөлөгчид БНХАУ-ын Чунцин их сургуульд айлчилж, “Бүс ба Зам” хамтарсан лаборатори байгуулахаар тохиров
Олон улсын Нээлттэй боловсролын өдөрлөг зохион байгуулагдлаа
Хангыль үсгийн баяр 20 дахь жилдээ зохион байгуулагдав
ШУТИС-ийн харьяа хүрээлэнгүүд хамтран ажиллах санамж бичиг байгууллаа
ШУТИС-ийн Монголын түүхийн хичээл дээр Тээврийн цагдаагийн алба, Цагдаагийн ерөнхий газар (ЦЕГ), Хар тамхитай тэмцэх газар хамтран урьдчилан сэргийлэх сургалтуудыг зохион байгууллаа
© 2005- Монгол Улсын Шинжлэх Ухаан Технологийн Их Сургууль, Мэдээллийн технологийн төв
