ШИНЖЛЭХ УХААН, ТЕХНОЛОГИЙН ИХ СУРГУУЛЬ

Хамтарсан судалгааны баг Япон улсын их дээд сургуулиуд, судалгааны хүрээлэнд ажиллаа

Инженер Технологийн Дээд Боловсрол төслийн хүрээнд ШУТИС-ийн “Монгол орны хүрээлэн буй орчин, газар хөдлөлтийн инженерчлэлийн судалгаа хөгжүүлэлт” хамтарсан судалгааны багийн гишүүд Япон улсын их дээд сургуулиуд, судалгааны хүрээлэнд 2016 оны 5 дугаар сарын 10-24-ний өдрийн хооронд ажиллаа.

“Монгол орны хүрээлэн буй орчин, газар хөдлөлтийн инженерчлэлийн судалгаа хөгжүүлэлт” сэдэвт J22D16 код бүхий ажил нь судалгааны чиглэл бүрд 6 дэд сэдвүүдийн хүрээнд хэрэгжиж байгаа ба энэ удаа 4 сэдэвт ажлын хүрээнд Япон талын хамтрагч нартай төслийн эхний уулзалт, судалгааны семинар хийлээ. Уулзалтын үеэр харилцан сонирхол бүхий судалгааны үйл ажиллагаа, судлаач солилцоо, ахисан түвшиний сургалт, судалгааны үр дүнг хэвлэн нийтлүүлэх, сургалт семинар зохион байгуулах зэрэг асуудлуудаар харилцан санал солилцон, багуудын хооронд хамтарсан судалгааны үйл ажиллагааны хүрээнд санамж бичигт гарын үсэг зурах ажлыг гүйцэтгэлээ. Үүнд:

J22D16-1: Доктор Ц.Цоггэрэл удирдагчтай “Газар хөдлөлтийн онлайн ажиглалтын систем байгуулах, Монгол улсад газар хөдлөлт инженерчлэлийн боловсролыг хөгжүүлэх” сэдэвт ажлын хүрээнд Тохокү Их Сургуулийн Профессор, Доктор Масато Мотосака
J22D16-2: Профессор, Доктор П.Мөнхбаатар удирдагчтай “Орхон, Туул голууд орчмын алтны шороон ордуудын байгаль орчинд үзүүлэх нөлөө, түүнийг багасгах технологийн судалгаа” сэдэвт ажлын хүрээнд Үндэсний Технологийн Институт, Мияаконожо Коллежийн Профессор, Доктор Эйсүкэ Хамада, Профессор, Доктор Рюуичи Моримо
J22D16-3: Дэд Профессор, Доктор Т.Улаанбаатар удирдагчтай “Хөгшин Орхон голын усны чанарт хими ба бактерологи, хүнд металлын үзүүлж буй нөлөө” сэдэвт ажлын хүрээнд Китакюүшү Их Сургуулийн Профессор, Доктор Тору Мацумото
Профессор, Доктор Н.Түгжсүрэн удирдагчтай “Улаанбаатар хотын агаар мандлын оптик төлөв ба агаарын бохирдлыг Скай-радиометрийн мэдээ ашиглан судлах нь” сэдэвт ажлын хүрээнд Чиба Их Сургуулийн Профессор, Доктор Тамио Такамура, Дэд Профессор, Доктор Хитоши Ирие нартай тус тус хамтарсан судалгаа хөгжүүлэхээр боллоо.

Мөн хамтарсан судалгааны зэрэгцээ, Японы Барилгын Судалгааны Хүрээлэнгийн Доктор Тошиаки Ёкой ахлагчтай судалгааны багтай хамтран ахисан түвшиний сургалтаар оюутан суралцуулах асуудлаар тохиролцлоо.

Тус судалгааны багийн хамт олноос ИТДБ төслийн хүрээнд хамтран ажиллаж буй ШУТИС-ийн ЭША, Төсөл Хэрэгжүүлэх Нэгж, Төслийн зөвлөх компани зэрэг нийт хамт олонд талархалаа илэрхийлье.

Мэдээ бэлтгэсэн: Төслийн координатор, Доктор Ц.Цоггэрэл.