ШИНЖЛЭХ УХААН, ТЕХНОЛОГИЙН ИХ СУРГУУЛЬ

Мэргэжил сурталчлах “ДЭВЖЭЭ” тэмцээн зохион байгуулав

ШУТИС-ийн Үйлдвэрлэлийн технологийн сургууль жил бүр уламжлал болгон зохион байгуулдаг Хүнсний Аж үйлдвэрийн гавьяат ажилтан, Техникийн Шинжлэх ухааны доктор, профессор Л.Дамдинсүрэнгийн нэрэмжит мэргэжил сурталчилах “Дэвжээ” тэмцээн 2019 оны дөрөвдүгээр сарын 5-нд “Урлаг” танхимд амжилттай болж өндөрлөлөө. Профессор Л.Дамдинсүрэн тэмцээнийг нээж, хүнсний мэргэжлээр суралцагч оюутнуудад мэргэжлийн онцлог, агуулгыг гүнзгий таниулах, онолын мэдлэгийг батжуулан технологийн хөгжлийн чиг хандлагыг төсөөлөх, мэдлэг эзэмших, ашиглах идэвхийг дээшлүүлэх, хамт олныг төлөвшүүлэх зорилготойг онцлон тэмдэглэж, оролцогч багуудад амжилт хүслээ.

Энэ тэмцээнийг 12 дахь жилдээ зохион байгуулж байгаа бөгөөд энэ удаад “Хүнсний аж үйлдвэр-бидний ирээдүй” сэдэв бүхий өвөрмөц хөтөлбөртэй байлаа. Тэмцээнд ҮТС-ийн хүнсний мэргэжлээр суралцагч оюутнуудаас бүрдсэн багууд өрсөлдөж, Хүнсний технологи мэргэжлийн “FTE” баг түрүүлэн, Хүнсний чанар аюулгүй байдал мэргэжлийн “Пирамид” баг 2-р байр, Хүнсний үйлдвэрийн менежмент мэргэжлийн “Шийдвэр гаргагчид” баг 3-р байр эзэллээ.

Мэдээлэл оруулсан: Ц.Сэлэнгэ