“Монгол бичиг түргэн сурах боломж” сэдэвт лекц


12-р сар. 2, 2019, 4:57 p.m.

ШУТИС- ийн сайн дурын хятад хэлний клуб 2019-2020 оны хичээлийн жилийн намрын улирлын арга хэмжээний хүрээнд  “Монгол бичиг түргэн сурах боломж” сэдэвт лекцийг ШУТИС-ийн “суралцахуйд суралцахуй” оюутан залуусын эх хэлний боловсрол, ирээдүйн ажлын байрны хэрэгцээг дэмжих зорилгоор клубийн зөвлөх Ц.Эрдэнэзаяа багшаа урьж энэхүү лекцээ зохион явууллаа.

Зөвлөх Ц.Эрдэнэзаяа багш маань клубийн зорилго, үйл ажиллагааны үр дүн хийгээд шинэ зууны хүн байх, оюутан байх, хувь хүнээс бие хүн болж төлөвших, чадварлаг боловсон хүчин болоход нийгмийн хэрэгцээ шаардлага хэрхэн хангаж буй, “soft skill” буюу дотоод ур чадварын талаар оюутан залуустай ярилцаж лекцээ эхлүүллээ. Тус лекцээрээ клубийн зөвлөх багш Монгол бичгийг сонирхон суралцагчдад заахдаа тэдний кирилл бичгээр унших, бичих чадварт тулгуурлан:

1.Үсгүүдийг багцалж таниулах, 2.Уламжлалт үеийн  аргаар заах, 3.Түргэн уншуулж, бичүүлж сургах арга зүйн туршлагаас товч өгүүлж, монгол бичгээ сурч эзэмшихийн тулд, хамгийн түрүүнд: цагаан толгой, үеийн тогтолцоо, зөв дуудах, зөв бичихэд баримтлах тулгуур зарчмуудыг сайтар ухаж ойлгох хэрэгтэй хэмээн заан зөвлөж Эгшиг үсэг, Гийгүүлэгч үсэг, Уншуулж сургах, Зөв бичүүлж сургах, Хичээнгүй бичүүлж сургах арга гэсэн 5 агуулгын хүрээнд ойлгомжтой танилцуулж, оюутан залуус бидэнд монгол бичгээ бие даан суралцах арга, анхаарах зүйл, сурахын чухлыг мэдүүлсэн ач холбогдолтой болж өндөрлөлөө.  

 

Оюутан залуус бидэнд цаг үеэ олсон үр дүнтэй лекц болсонд клубийн гишүүдийн өмнөөс зөвлөх багшдаа чин сэтгэлээсээ баярлалаа. Тус лекцэд  ГХС-ийн ТТО-ын 3,4-р анги, ЭХС, ГУУС, ХШУС-ийн хөтөлбөрийн 1,2-р ангийн оюутнууд болон хятад хэлний клубийн идэвхтэн гишүүд  нийт 50 орчим оюутнууд идэвхтэй оролцлоо. 

Өнгөт ертөнцөд сайхан газар олон буй

Өлгий нутгаас минь сайхан газар үгүй

Эрдэм сурахад хэл бүхэн сайхан буй

Эх хэлийг минь гүйцэх сайхан хэл үгүй...

                            Академич Б.Ренчин

Хятад хэлний клубийн үйл ажиллагаанд идэвхтэй оролцдог, дэмжин ажилладаг хүндэт багш, оюутан, клубийн гишүүддээ гүн талархлаа илэрхийлье.

ГХС-Хятад хэлний клуб 2019-11-28