“Ажил олгогчдын өдөрлөг”


5-р сар. 24, 2019, 6:46 a.m.

2019.05.22-ны өдөр ШУТИС-ийн Мэдээлэл Холбооны Технологийн Сургууль дээр “Ажил олгогчдын өдөрлөг амжилттай зохион байгуулагдлаа.

Энэхүү өдөрлөгийн хүрээнд:

  1. Ажил олгогчид байгууллагынхаа үйл ажиллагаа, бүтээгдэхүүн, үйлчилгээгээ сурталчлах, нээлттэй ажлын байруудыг зарлах, урьдчилсан сонгон шалгаруулалт хийх
  2. Ажил олгогчдын төлөөлөл ахлах курсын оюутнуудад зориулж орчин үеийн ICT технологийн талаар сонирхолтой илтгэл хэлэлцүүлэх
  3. МХТС-ийн салбар, нэгжүүд өөрсдийн сургалт, эрдэм шинжилгээний үйл ажиллагаа болон  хөтөлбөрийн оюутнуудынхаа суралцах хугацааны амжилт, бүтээлийг танилцуулах
  4. МХТС болон ажил олгогч байгууллагууд хамтран ажиллах талаар санал солилцох

зэрэг үйл ажиллагаанууд зохион байгуулагдлаа.

 

Өдөрлөгт МХТС-ийн профессор багш, ажилтнууд, 200 гаруй төгсөх оюутнууд, 300 гаруй 3-р курсын оюутнууд болон Монголын Үндэсний Олон Нийтийн телевиз, Үндэсний дата төв, Нийслэлийн мэдээллийн технологийн газар, Харилцаа холбооны зохицуулах хороо, Хас банк, Худалдаа хөгжлийн банк, Голомт банк, Төрийн банк, Цагдаагийн ерөнхий газар, Юнител групп, Жи-Мобайл ХХК, Монгол Шуудан ТӨХК, Монголын Цахилгаан холбоо, М-Си-Эс Интернейшнл, Мэдээлэл холбооны сүлжээ төрийн өмчит компани, DDAM япон монголын хамтарсан компани зэрэг 20 гаруй байгууллага оролцлоо.

 

Мэдээлэл, Холбооны Технологи өндөр хурдацтай хөгжиж, улс орны хөгжлийн гол хурдасгуур болж байгаа төдийгүй, аж үйлдвэрийн 4-р хувьсгалын үндэс суурь болж буй өнөө цагт мэргэжилтэн бэлтгэдэг сургууль, ажил олгогчдын хамтын ажиллагааг өргөжүүлэхэд энэхүү өдөрлөг чухал ач холбогдолтой бөгөөд цаашид өдөрлөгийг жил бүр уламжлал болгон зохион байгуулахаар төлөвлөж байна.

  

ШУТИС-ийн МХТС нь 2018-2019 оны хичээлийн жилийн байдлаар Мэдээллийн технологи, Мэдээллийн систем, Сүлжээний технологи, Системийн аюулгүй байдал, Програм хангамж, Компьютерийн ухаан, Утасгүй холбоо, Цахилгаан холбоо, Электроник зэрэг сургалтын хөтөлбөрөөр 1960 гаруй оюутанд сургалт явуулж, орчин үеийн Мэдээлэл Холбооны Технологи(МХТ)-ийн чиглэлийн мэдлэг, ур чадвар, хандлага эзэмшүүлэхээр ажиллаж байна.

МХТ-ийн чиглэлээр ажиллах мэргэжилтэн хайж буй байгууллага, хувь хүмүүс  www.career.sict.edu.mn    сайтаас  төгсөгчдийн талаар мэдээлэл авах, холбоо тогтоох боломжтой.

МХТС-ийн захиргаа