ШИНЖЛЭХ УХААН, ТЕХНОЛОГИЙН ИХ СУРГУУЛЬ

Хэвлэл мэдээллийн байгууллагуудтай уулзалт хийлээ

ШУТИС-ийн хамт олон дээд боловсролын шинэчлэлийн хүрээнд хийж хэрэгжүүлж буй ажлынхаа талаар 2014 оны 9 дүгээр сарын 6-ны өдөр хэвлэл мэдээллийн салбарынхантай уулзалт хийлээ. Уулзалтын үеэр ШУТИС-ийн бүрэлдэхүүн 8 сургууль, номын сан, эрүүл мэндийн төв, оюутны хөгжил, үйлчилгээний алба, е-нээлттэй институт өөрсдийн бүтээлийн үзэсгэлэнг хэвлэл мэдээллийн салбарынханд танилцуулахаар дэлгэн тавижээ.

Түүнчлэн проректор Т.Намнан “ШУТИС-ийн өнөөгийн төлөв, хэтийн зорилт”, проректор Х.Энхжаргал “Инженерийн боловсролын шинэчлэл”, проректор Ч.Баасандаш “Эрдэм шинжилгээ, судалгаан ажил”, проректор П.Жаргалтуяа “Гадаад харилцаа хамтын ажиллагаа”, тэргүүн проректор Д.Батчулуун “Санхүү, эдийн засаг, нийгмийн хөгжил”-ийн талаар товч танилцуулга хийв. Уулзалтанд БШУЯ-ны Стратегийн бодлого төлөвлөлтийн газрын дарга Б.Насанбаяр, ШУТИС-ийн бүрэлдэхүүн сургуулийн захирлууд, ахлах сургууль, Коосен технологийн коллежийн захирал, газрын дарга, албадын дарга нар оролцлоо. Уулзалтын үеэр хэвлэл мэдээллийн байгууллагын сэтгүүлчидтэй чөлөөт ярилцлага хийж, “Meal plus” оюутны жишиг зоогийн газартай танилцуулав.

Өнгөрсөн хичээлийн жилээс ШУТИС өөрчлөлт шинэчлэлтийн хөтөлбөрийг дэвшүүлэн, энэ хичээлийн жилд шинэ бүтэц зохион байгуулалтаар эхлүүлжээ. Сургалтын хөтөлбөрүүдийг олон улсын жишиг, стандартад нийцүүлэн өөрчилж 53 мэргэжлийн хөтөлбөрөөр 5000 гаруй оюутан шинээр элсүүлэн суралцуулж байна. 2014-2015 оны хичээлийн жилд ШУТИС 8 бүрэлдэхүүн сургууль, Дархан-Уул аймаг дахь технологийн сургууль, ШУТ-гийн ахлах сургууль, Коосэн технологийн дээд сургуультайгаар үйл ажилагаагаа явуулж байна. ШУТИС цаашид судалгаанд суурилсан их сургууль болон хөгжих зорилт тавин ажиллаж байгаагаа уулзалтанд ирсэн сэтгүүлчдэд танилцуулав.