"МИШЭЭЛ ЭКСПО-2026" үзэсгэлэнгийн үеэр “Арьс шир, ноос ноолууран түүхий эдийн чанар, үнэ цэнийн сүлжээ, инновац” сэдэвт эрдэм шинжилгээ, онол практикийн хурал 2026 оны 10 дугаар сарын 30-ны өдөр “Ibis Styles Ulaanbaatar” зочид буудлын хурлын танхимд амжилттай зохион байгуулагдлаа.

Тус хурлыг ХААИС, ШУТИС-ийн LEATHUB төв. Хүнс, хөдөө аж ахуй, хөнгөн үйлдвэрийн яам .Монголын арьс ширний үйлдвэрлэлийн холбоо, Монголын ноос ноолуурын холбоо болон Европын Холбооны санхүүжилттэй ITDM төсөл хамтран амжилттай зохион байгуулав.

Хурлын хүрээнд салбарын шинжлэх ухаан, технологи, бодлого, үйлдвэрлэлийн уялдаа холбоог сайжруулахад чиглэсэн үндсэн 4 чиглэлийн 13 илтгэлийг хэлэлцүүллээ:

• Түүхий эдийн чанар, стандарт ба баталгаажуулалт: Ноос, ноолууран бүтээгдэхүүний чанарын стандарт, баталгаажуулалт болон олон улсын тогтвортой байдлын стандартын хөгжүүлэлт, хэрэгжүүлэлт, түүнчлэн стандартын шаардлагад нийцүүлэн мал аж ахуйг хөгжүүлэх асуудлуудыг хөндөн хэлэлцсэн.
• Түүхий эд бэлтгэл, салбарын бодлого ба кластер: Мал аж ахуй болон хөдөө аж ахуйн салбарын бодлогын хөшүүрэг, түүхий эд бэлтгэлийн сүлжээний үр дүн, ITDM төслийн хүрээн дэх инновацын кластер, малчдын хоршоонд тулгамдаж буй асуудал, шийдлийг танилцуулсан.
• Инновац, дахин боловсруулалт ба хаягдлын ашиглалт: Чацарганын навчны хандыг сарлагийн шир боловсруулахад ашигласан туршилтын үр дүн, хонины ноосыг нэмүү өртөгтэй биоматериал (кератин) болгон ашиглах судалгаа болон арьс шир боловсруулалтын хатуу хаягдлыг малын тэжээл болгон ашиглах боломжуудыг танилцуулав.
• Хөдөлмөрийн аюулгүй байдал, эрүүл ахуй: Мал, амьтны арьс шир, ноос ноолуурт паразитаас үүсэх сөрөг нөлөөнөөс урьдчилан сэргийлэх болон хөнгөн үйлдвэрлэлийн салбарын инновац, хөдөлмөрийн аюулгүй байдлын стандартын талаар салбарын эрдэмтэд, судлаачид илтгэл тавилаа.

Энэхүү эрдэм шинжилгээ, онол практикийн хурал нь арьс шир, ноос ноолуурын чанар, стандартыг дээшлүүлэх, эко болон инновацын шийдлээр дахин боловсруулах, түүхий эд бэлтгэлийн сүлжээ ба мал эмнэлгийн урьдчилан сэргийлэлтийг сайжруулахад чиглэсэн ач холбогдолтой арга хэмжээ боллоо.