Эрүүл мэндийн яам, Олон улсын эмнэлгийн инженерүүдийн холбоо (IFBME), Шинжлэх Ухаан Технологийн Их Сургууль, Эрчим Хүчний Сургууль, Монголын эмнэлгийн инженерчлэлийн нийгэмлэгтэй хамтран “The Development of Biomedical Engineering in Mongolia” сэдэвт олон улсын эмнэлгийн инженерүүдийн эрдэм шинжилгээний хурал 2016 оны 10 сарын 01-ний өдөр Эрүүл Мэндийн Яамны сургалт мэдээллийн танхимд амжилттай зохион байгуулагдлаа.

Энэхүү хурлаар олон улсын эрүүл мэндийн технологийн өнөөгийн байдал, тулгамдаж буй асуудал, мэргэжилтэн бэлтгэж буй чиг хандлагатай танилцаж, туршлага солилцохын зэрэгцээ Монгол улсын эрүүл мэндийн салбарын техник, технологийн өнөөгийн хөгжилд эмнэлгийн тоног төхөөрөмжийн инженерүүдийн гүйцэтгэх үүрэг оролцоог тодорхойлох, өнөөгийн байдал болон тулгамдаж буй асуудлуудыг хэлэлцэж, цаашдын зорилт, чиглэлийг тодорхойлох зэрэг олон талын ач холбогдол бүхий хурал болсон юм.

Энэ жилийн “The Development of Biomedical Engineering in Mongolia” сэдэвт олон улсын эрдэм шинжилгээний хурал нь Монгол улсад эмнэлгийн техникийн дээд боловсролтой мэргэжилтэн бэлтгэж эхэлсний 20 жилийн ойн хүрээнд зохион байгуулсан томоохон ажлуудын нэг бөгөөд Монголын эмнэлгийн инженерчлэлийн нийгэмлэгээс санаачилсан анхдугаар олон улсын хурал болсноороо онцлогтой юм.

Уг эрдэм шинжилгээний хурлыг нээн Монголын эмнэлгийн инженерчлэлийн нийгэмлэгийн тэргүүн Б.Энхжаргал үг хэлж, ЭМЯ-ны дэд сайд Л.Бямбасүрэн, Олон улсын эмнэлгийн инженерүүдийн холбооны (IFBME) ерөнхий нарийн бичгийн дарга Kang-Ping Lin нар тус тус мэндчилгээ дэвшүүллээ.

Олон улсын хуралд аман (oral) болон ханын илтгэл (poster) хэлэлцүүлснээс гадна Монголын эмнэлгийн инженерүүдийн чуулганы илтгэлүүд тавигдсан болно. Үүнд:

•        “Certification of BMEs/CEs in Taiwan” Илтгэгч: Prof. Kang-Ping Lin, Олон улсын эмнэлгийн инженерүүдийн холбооны нарийн бичгийн дарга, Тайваны Chung-Yuan Christian Их Сургууль
•        “Certification of BMEs/CEs in Japan” Илтгэгч: Dr. Masaru Sugimachi, Японы эмнэлгийн инженерүүдийн нийгэмлэгийн тэргүүн
•        “Development of Biomedical Engineering Education in Hong Kong” Илтгэгч: Dr. Eric Tam, Хонгконгийн Политехникийн Их Сургууль,
•        “Sharing the experience in BME training in Myanmar” Илтгэгч: Mdm Tan Peck-Ha,Сингапурын эмнэлгийн инженерүүдийн нийгэмлэгийн нарийн бичгийн дарга Ngee Ann Политехникийн Их Сургууль
•        “BME Education in National University Singapore – Updates” Илтгэгч: Assoc Prof. Toh Siew-Lok, Сингапурын эмнэлгийн инженерүүдийн нийгэмлэгийн дэд ерөнхийлөгч, Сингапурын Үндэсний Их Сургууль,
•        ““BME Education and Training in Mongolia” Илтгэгч: Дэд проф, Док. (Ph.D) Б.Энхжаргал Д.Пүрэвдаш, А.Амаржаргал, Монголын эмнэлгийн инженерүүдийн нийгэмлэгийн тэргүүн, ШУТИС, ЭХС
•        “Development of multifunctional Eudragit RS 100 nanofibers for biomedical application” Илтгэгч: Док. (Ph.D) А.Амаржаргал, ШУТИС, ЭХС
•        “Biomedical Engineering in Sleep Medicine” Илтгэгч: Докторант У.Эрдэнэбаяр, Юнсей Их Сургууль
•        “Preparation of chitosan microcarriers by use of high-voltage electrostatic field and freeze drying” Илгэгч: М.Бумбат, Шанхайн Шинжлэх Ухаан Технологийн Их Сургууль
•        “Power quality issues and effects on medical electrical equipment operation” Илтгэгч: Докторант Д.Пүрэвдаш, ШУТИС, ЭХС
•        “The structure of expert system by pulse diagnosis” Илтгэгч: Докторант А.Юмчмаа, ОХУ-ын Новосибирскийн Техникийн Их Сургууль

Хурлын үйл ажиллагааг дэмжин ажилласан ШУТИС, Эрчим Хүчний Сургуулийн захиргаанд талархал илэрхийлье.

Мэдээ бэлдсэн: А.Амаржаргал