ШУТИС-ийн Удирдах зөвлөл(УЗ)-ийн ээлжит хурал 2014 оны дөрөвдүгээр сарын 14-ний өдөр боллоо. Удирдах зөвлөлийн дарга Д.Одхүү өөр ажилд шилжсэнтэй холбогдуулан өөрийн хүсэлтээр УЗ-ийн гишүүнээс чөлөөлөгдөх хүсэлт гаргасныг БШУ-ны сайд хүлээн авч, түүний оронд төрийн төлөөлөлд УИХ-ын даргын зөвлөх Ц.Буянцогтоог УЗ-ийн гишүүнээр томилсон тушаал гаргасан болно.

   Хурлын эхэнд Д.Одхүү тус тушаалыг болон өөрийн чөлөөлөгдөх болсон шалтгааныг танилцуулж УЗ-ийн цаашдын үйл ажиллагаанд амжилт хүслээ.

     ШУТИС-ийн УЗ-ийн гишүүд УЗ-ийн үйл ажиллагааг амжилттай удирдаж, үр дүнтэй ажиллаж байсанд нь талархал илэрхийлж Д.Одхүүд  цаашдын ажилд нь өндөр амжилт хүслээ. Тухайлбал, УЗ-ийн гишүүн, Монгол Улсын анхны Ерөнхийлөгч П.Очирбат: “Д.Одхүү УЗ-ийн даргаар ажиллахдаа өөрийн гэсэн зорилготой, зүг чигтэй орж ирж гишүүд хамт олныг ойлгож ажиллаж байсанд нь талархал илэрхийлж, цаашид хийж хэрэгжүүлэх ажилд нь өндөр амжилт хүсье” гэлээ.  

ШУТИС-ийн Удирдах зөвлөлийн даргын сонгууль болж гишүүн Л.Лувсанжамц гишүүн Ц.Буянцогтоогийн нэрийг дэвшүүлж танилцуулав. УЗ-ийн гишүүд нэр дэвшигчээс сонирхсон асуултандаа хариулт авлаа. Санал хураалтаар гишүүдийн 100  хувийн санал авч Ц.Буянцогтоо УЗ-ийн даргаар сонгогдлоо.