Шинжлэх ухаан, технологийн их сургуулийн Барилга байгууламж, дэд бүтцийн албаны механик инженер Б.Намуундөл 2026 оны 1 дүгээр сарын 31-нээс 2 дугаар сарын 7-ны өдрүүдэд Бүгд Найрамдах Узбекистан Улсын Ташкент хотод зохион байгуулагдсан Гар барилдааны Дэлхийн цомын аварга шалгаруулах тэмцээний Пара гар барилдааны төрөлд амжилттай оролцож, хүрэл медаль хүртлээ.

Тус Дэлхийн цомын тэмцээнд Монгол Улсаас нийт 7 тамирчин оролцсон бөгөөд манай багийн бүх тамирчид медаль хүртэж, нийт 11 медальтайгаар тэмцээнээ амжилттай өндөрлүүлсэн нь Монголын гар барилдааны спортын түүхэнд онцлох амжилт боллоо.

Энэ удаагийн тэмцээнд Б.Намуундөл нь зөвхөн тамирчнаар зогсохгүй Монголын багийн ахлагч, дасгалжуулагчаар ажиллаж, багаа удирдан дэлхийн чансаатай тэмцээнээс медаль хүртэхэд чухал хувь нэмэр оруулсан юм.

ШУТИС нь ажилтан, багш нарынхаа спортын болон нийгмийн идэвхтэй оролцоо, олон улсын тавцанд гаргасан амжилтаар бахархаж байна. Б.Намуундөл танд цаашдын спортын болон ажил, мэргэжлийн замналд улам их амжилт, өндөр дээд амжилтыг хүсэн ерөөе.

Бид нэг ШУТИС.