2023 оны 3-р сарын 4-ний өдөр ШУТИС-ийн Гадаад харилцаа, нийгмийн түншлэлийн алба “Наран Ижий Заяа” ТББ-тай хамтран нийтийн эрүүл мэндийн боловсролыг дэмжих чиглэлээр гурван арга хэмжээ төлөвлөсний эхнийх болох “Хорт хавдраас урьдчилан сэргийлэх, тэмцэх мэдээллийн өдөрлөг”-ийг ШУТИС-ийн багш, ажилтнуудад зориулан зохион байгууллаа. Тус өдөрлөгт ХСҮТ-ийн захирал Н.Эрдэнэхүү, Цээжний хөндийн мэс заслын тасгийн эмч Б.Азжаргал, Элэг цөс, нойр булчирхайн мэс заслын тасгийн эмч Д.Минжүүр, хорт хавдрыг даван туулагч нар, Хилийн чанад дахь Монголчуудын Зөвлөлийн тэргүүн Н.Номун-Эрдэнэ , “Наран Ижий Заяа” ТББ-ын тэргүүн Ш.Ариунаа, ШУТИС-ийн багш, ажилтнууд оролцов. Энэ нь хорт хавдраас сэргийлэх, эрт илрүүлэг хийлгэхийн ач холбогдлыг ойлгуулсан чухал арга хэмжээ боллоо.