Гадаад хэлний сургуулийн хамт олон бид үүсэн байгуулагдсан түүхт 30 жилийн ойн хүрээнд зохион байгуулсан арга хэмжээнүүдээ товчоолон хүргэж байна. Манай сургууль анх зөвхөн инженер, техник, технологийн мэргэжлийн оюутнуудад гадаад хэл заадаг байсан бол өнөөдөр хэл шинжлэлийн салбарт 1800 гаруй бакалавр, магистр, доктор зэрэгтэй мэргэжилтэн бэлтгэн гаргасан; хурдтай хөгжиж буй орчин үеийн эрэлт хэрэгцээ, шаардлагад нийцүүлсэн орос, англи, япон, хятад, солонгос хэлний техник, технологийн орчуулагч бэлтгэдэг; сургалт, судалгааны байгууллага болсон төдийгүй эрдэмтэн багш нар маань эрдэм шинжилгээ, судалгааны ажлынхаа үр өгөөжийг дээшлүүлснээр хэрэглээний хэл шинжлэл, нэр томьёо судлал, мэдээллийн технологид суурилсан гадаад хэл заах арга зүйн судалгаагаар үндэсний хэмжээний дэг сургууль болох том зорилт дэвшүүлэн ажиллаж байна.  

Эрдэм шинжилгээ

1. 2022 оны 2-р сарын 21-ний өдөр ГХС-ийн 30 жилийн ойн хүрээнд, "Хэл, сургалт, судалгаа, технологи" сэдэвт хэлэлцүүлгийг МУ-ын ерөнхийлөгчийн дэргэдэх Хэлний бодлогын үндэсний зөвлөл, ШУА-ийн ХЗХ, ШУТИС-ийн ГХС, НБГ, МХББСҮХ хамтран зохион байгуулж, цахим болон танхимаар 500 гаруй багш, судлаач эрдэмтэн, мэргэжилтнүүд оролцлоо. Хэлэлцүүлгээр ШУТИС-ийн ГХС-ийн багш Н.Мөнхжаргал, Б.Сонинцэцэг "Эх хэлний сургалт ба цахим технологи", ХЗХ-ийн эрдэм шинжилгээний ажилтан Т.Пүрэвсүрэн "Цахим хөмрөгт суурилсан судалгааг эх хэлний сургалтад ашиглах нь", Конгрессын номын сангийн монгол номын мэргэжилтэн М.Саруул-Эрдэнэ "Хэл сурах, сургах арга ба технологи", МУИС-ийн профессор багш Н.Нансалмаа "Хэлээр дамжуулж хүнийг хэрхэн бүтээдэг вэ?" гэсэн илтгэлүүд тавьж, Монгол хэлний хууль, бодлогын хэрэгжилт, эх хэлний сургалт, судалгааны өнөөгийн байдал, шинэчлэл, заах арга зүйн талаар хэлэлцүүлэг хийв.
2. 2022 оны 4 сарын 8-нд “Европ судлал: Хэл шинжлэл, Олон улсын харилцаа, Орон судлал -VI” сэдэвт олон улсын эрдэм шинжилгээний хурлыг МУИС-ийн Шинжлэх Ухааны сургуулийн Европ судлалын тэнхим, ШУТИС-ийн Гадаад хэлний сургууль, МУБИС-ийн Нийгэм, хүмүүнлэгийн ухааны сургууль, ШУА-ийн ОУХ-ны хүрээлэн, Хүмүүнлэгийн ухааны их сургууль хамтран зохион байгууллаа.
3. 2022 оны 4 сарын 29-нд “Ази судлал-2022 /ICAS2022/” Олон улсын эрдэм шинжилгээний VIII хурал зохион байгуулж, Монгол, БНХАУ, ОХУ, Япон, БНСУ, БНТУ, БНКУ зэрэг орны 80 шахам ШУА, судалгааны хүрээлэн, их дээд сургуулийн эрдэмтэн судлаач, профессор багш нар оролцож 50 гаруй илтгэл амжилттай хэлэлцүүлэн илтгэлээр хурлын эмхэтгэл гаргав. Энэ удаагийн хурлын илтгэлд ихэвчлэн суурь судалгааны үндсэн асуудлыг хөндөж, шинэ чиг хандлага, шинэлэг арга зүйд тулгуурласан илтгэлүүд хэлэлцүүлснээрээ ихээхэн онцлогтой байсан төдийгүй судалгааны үр дүнгээ харилцан солилцсонд тус хурлын ач холбогдол оршино.

4. Монгол Улсад орчин цагийн шинжлэх ухаан үүсэж хөгжсөний 100 жил, Шинжлэх ухааны академи байгуулагдсаны 60 жилийн ой, ШУТИС-ийн Гадаад хэлний сургуулийн 30 жилийн ойн хүрээнд ШУА-ийн Хүмүүнлэгийн салбарын Бага чуулгантай хамтран Гадаад хэлний сургуулийн эрдэм шинжилгээ, сургалтын үйл ажиллагааг танилцуулсан “Цахим өдөрлөг”-ийг 2022 оны 05 сарын 04-ний өдөр зохион байгуулсан. Цахим өдөрлөгийн хүрээнд сургуулийн албан ёсны вэб хуудас хөтлөлт, хөгжүүлэлтийг идэвхжүүлэн, гадаад хэлний сургуулийн эрдэмтэн багш нарын судалгааны ажлын сүүлийн үеийн шинэлэг үр дүн, багш нарын зохион эмхэтгэсэн сурах бичиг, гарын авлагын тухай танилцуулгыг видео хэлбэрээр байршуулсан төдийгүй гадаад хэлний сургалттай холбоотой танин мэдэхүйн мэдээ, мэдээллүүдийг байршууллаа. Цахим өдөрлөгөөр ГХС-ийн ерөнхий танилцуулга, хэрэгжиж буй төсөл хөтөлбөр, эрдэм шинжилгээний ажил, сургалтын үйл ажиллагаа, Ерөнхийлөгчийн илгээлт 2100 хөтөлбөрийн танилцуулга болон сүүлийн 2 жилд докторын зэрэг хамгаалсан 4 багш судалгааны ажлын үр дүнгээсээ танилцууллаа.
5. Шинжлэх ухаан, технологийн хөгжилд тулгарч буй нэр томьёотой холбоотой асуудал, тэдгээрийг шийдвэрлэх арга зам, шинжлэх ухаан, технологи, боловсролын хөгжилд нэр томьёоны гүйцэтгэх үүрэг, ач холбогдлыг олон нийтэд сурталчлан таниулах, орчин үеийн нэр томьёоны шинжлэх ухааны өнөөгийн байдал, цаашдын хөгжлийн чиг хандлагын талаар олон улсын эрдэмтэн судлаачидтай мэдээлэл солилцох, хамтын ажиллагааг өргөжүүлэн хөгжүүлэх зорилгоор 2022 оны 7 сарын 8-нд ШУА-ийн ХЗХ, УИХ-ын Тамгын газар, МУ-ын Хэлний бодлогын үндэсний зөвлөл, Олон улсын нэр томьёоны мэдээллийн төв, МУ-ын ШУА, МУИС, МУБИС, Стандартчилал хэмжил зүйн газартай хамтран “Нэр томьёо ба шинжлэх ухаан, технологийн хөгжил” сэдэвт ОУ-ын ЭШХ зохион байгуулсан. ЭШХ-д ШУТИС-ийн ХШУС, МХТС, МеТС, БАС, ЭХС, ҮТС хамтран оролцож ЭХС-ийн С.Батмөнх, Б.Бат-Эрдэнэ, П.Бямбацогт нар “Эрчим хүчний салбарын нэр томьёоны хэрэглээ, түүнд тулгарч буй асуудал”,  ГХС-ийн Г.Томтогтох, Д.Дуламсүрэн нар “Техник технологийн нэр томьёо дахь төрөл үгийн хэрэглээ”, Б.Дэлгэрмаа “Нэр томьёоны тогтолцоо дахь техник, технологийн нэр томьёоны байр суурь, онцлог”, Р.Бигэрмаа “Баримт бичгийн стандартын нэр томьёо, түүний хэрэглээ”, С.Баасанжаргал “Техник технологийн эрдэм шинжилгээний эхээс нэр томьёог Sketch Engine программаар түүвэрлэх нь”, Ц.Мөнхдэлгэр, Б.Содном нар “Уул уурхайн геотехникийн мэргэжлийн нэр томьёог зөв оноож хэвшүүлэх нь” илтгэлийг тус тус хэлэлцүүлэв.
6. 
   “Хэл ба дэвшилтэт технологи (LANGUAGE AND ADVANCED TECHNOLOGY) эрдэм шинжилгээний бага хурлыг 2022 оны 11 сарын 9-ний Лхагва гаригт /ШУТНС 604 тоот, 14:00 цаг/ зохион байгууллаа. Хурлаар Гүн мэдрэлийн сүлжээнд суурилсан монгол хэлний ярианы синтезийн судалгаа, Монгол бичгийн программууд, түүний хэрэглээ, Цахим сургалтын асуудал, шийдлийн тухай, Үгийн сангийн хөмрөг хэрхэн байгуулах болон анхаарах зүйлс, Цахим хэл шинжлэлийн зарим программыг эх хэлний сургалтад хэрэглэж буй тухайд зэрэг дэвшилтэт технологийг хэлний судалгаанд хэрхэн ашиглаж буй талаарх судалгаанууд хэлэлцүүлэгдлээ. Түүнчлэн Техник, технологийн дискурсийн метафорын судалгаа, Монгол оюутнууд англи хэлний ялгац гишүүнийг хэрхэн хэрэглэж буй талаарх судалгаа, Монгол хэлийг гадаад оюутанд тонгоруу сургалтын аргаар заасан туршилт судалгааны үр дүн зэрэг танихуйн хэл шинжлэл, гадаад оюутнуудад монгол хэл заах арга зүй, монгол оюутнуудад англи хэл заах арга зүйн сэдвээр хийгдсэн судалгаанууд хэлэлцүүлэгдсэн. Нийт 9 илтгэл ирж 8 илтгэл хэлэлцүүлсэн. ЭШХ-д ШУА-ийн ХЗХ, МУИС-ийн Дорнод дахь салбар сургууль, Монгол Германы техникийн дээд сургууль, СУИС, ШУТИС-ийн Мэдээлэл холбооны технологийн сургууль, Гадаад хэлний сургуулийн багш, судлаач, ахмад багш нар оролцлоо.
7. Профессор багш нарын судалгааны бүтээлийг эргэлтэд оруулах зорилгоор 2008 оноос эхлэн эрхлэн гаргаж буй “Хавсарга хэл шинжлэл” эрдэм шинжилгээний бичигт олон улсын сэтгүүлийн ISSN 2790- 9131 дугаар авч, ГХС байгуулагдсаны 30 жилийн ой угтан “Хавсрага хэл шинжлэл №18” /ISSN 2790-9131/ сэтгүүл эрхлэн гаргалаа. Энэ дугаарт бид сургалтын хөтөлбөр, хэлний хэрэглээ, нэр томьёо судлал, орчуулга зүй,  гадаад хэл заах арга зүй, сургалтын цахим технологи зэрэг асуудлаар судалгаа хийж буй судлаач, багш, эрдэмтдийн хамтын ажиллагааг дэмжих, харилцан туршлага судлах, хичээлийн үр өгөөжийг сайжруулах боломжийг эрэлхийлэх, судалгааны ажлын явц, цаашдын чиг хандлагыг сурталчлан таниулах зорилго бүхий эрдэм шинжилгээний 14 өгүүлэл хэвлүүлсэн. Түүнчлэн ГХС-ийн багш нарын зохиосон ШУТИС-ийн ахисан түвшний сургалтад ашиглах англи хэлний сурах бичиг, мэргэжлийн англи хэлний орчуулагчийн ангид ашиглах англи хэлний дүрэм ба үгийн сангийн сурах бичиг, техникийн солонгос хэл, техникийн хятад хэлний сурах бичгийн танилцуулга хэвлэгдэн, олны хүртээл боллоо.
8. 2022 оын 1 сард ХХШС-аас эрхлэн “Хэрэглээний хэл шинжлэлийн асуудалд II” эрдэм шинжилгээний бичиг эмхэтгэн хэвлүүлсэн. Энд орсон судалгааны өгүүллүүд нь манай багш судлаачдын сүүлийн үед хийж буй судалгааны ажлын эцсийн болон завсрын үр дүнг тусгасан бөгөөд эрхэм уншигч, ялангуяа магистрант, докторантуудад ямар нэг хэмжээгээр тус нэмэр болоод зогсохгүй, цаашид эх сайхан монгол хэлний маань үгийн сангийн тодорхой нэг хэсэг болсон нэр томьёог шинжлэх ухааны үндэслэлтэй, тогтолцоотой болгон хөгжүүлэхэд ямар нэгэн хэмжээгээр тус дэм болно” гэж редакцын зөвлөл үзэж байна.
9. 2022 оны 12 сарын 2-нд ГХС-30 жил профессорын семинар “Хэлний сургалт, судалгаа” сэдвээр зөвлөх профессор Г.Томтогтох илтгэл тавив. 

Хамтын ажиллагаа

1. Енсей их сургуулийн Өрнө Дорны судалгааны хүрээлэнтэй 2021.08.23-ны өдөр Хамтын ажиллагааны санамж бичиг үзэглэн "Yonsei-KF Global E-School"  төслийг Korea Foundation буюу Солонгос сангийн санхүүжилттэй хэрэгжүүлж Ёнсей их сургуулийн 3 профессор цахимаар хичээл орж байна.

2. 2022.06.08-нд ШУА-ийн Хэл зохиолын хүрээлэнтэй хамтран ажиллах Санамж бичиг байгуулав. ШУА-ийн Хэл зохиолын хүрээлэн болон ШУТИС-ийн Гадаад хэлний сургуулийн профессор, багш, судлаачдын хамтын ажиллагааг өргөжүүлэх, олон улсын түвшинд хүргэсэн судалгаа хөгжүүлэлтийг хийх, судалгааг сургалттай нягт холбох, олон улсад хүлээн зөвшөөрөгдсөн мэдлэг чадвар бүхий мэргэжлийн боловсон хүчнийг бэлтгэх чиглэлээр хамтын ажиллагааг өргөжүүлэхээр тохиролцлоо.

3. Өмнөговь аймгийн Даланзадгад хотноо 2022 оны 5 сарын 26-ны өдөр ШУТИС-ийн сургалт, судалгаа, инновацийн ажлын үр дүнг танилцуулах өдөрлөгт ГХС сургалт, судалгааны үр дүнгээ танилцуулав. ШУТИС-ийн мэргэжил сурталчлах өдөрлөг нь хөдөө орон нутагт суралцаж буй сурагчдад их сургуулийн сургалтын хөтөлбөрүүдтэй танилцах, ирээдүйн мэргэжлээ сонгоход нь дэмжлэг үзүүлэх  боломж, бололцоог нээж өгч байгаагаараа онцлог болсон юм.

Сургалт, сурах бичиг, гарын авлага, нэг сэдэвт бүтээл

1. ГХС-ийн Эрдмийн зөвлөлийн 2021 оны 5 сарын 19-ний хурлаар ГХС-ийн зөвлөх профессор, доктор профессор Г.Томтогтохын эрдэм судлалын бүтээл нь ШУТИС-ийн “Манай эрдэмтэд” эрдэм шинжилгээний цувралд хэвлүүлэх болзол хангасан тул хэвлүүлэхийг дэмжин, зардлыг ШУТИС-ийн ном сурах бичиг хэвлүүлэх журмын дагуу гаргахаар шийдвэрлэж 2022 оны 11 сард Манай эрдэмтэд цувралын №84 дугаарт Г.Томтогтох профессорын эрдэм судлалын ажлын бүтээлээс дээжлэн “Хэл: сургалт судалгаа” бүтээл хэвлэгдэв.

2. 2022 оны 11 сард эзэмшсэн мэргэжлээрээ эрхэлсэн ажилдаа үнэнчээр зүтгэж, сурган хүмүүжүүлэх, судлан шинжлэх, мэргэжилтэн бэлтгэх бүхнийг бүтээлцэж буй хамт олныхоо ажил үйлс, амжилт бүтээлийг дурдан, хамтдаа өнгөрүүлсэн гурван арванаа дурсаж, дүгнэж, цаашдын 30 жилээ төлөвлөсөн “Гадаад хэлний сургуулийн түүхэн замнал 30 жил” түүхэн номыг хэвлэн гаргав. Номд Захиргаа, Захирлын зөвлөл, Сургалт, чанарын алба, Хөтөлбөрийн дэд хороо, Эрдэм шинжилгээ, хамтын ажиллагаа, Эрдмийн зөвлөл, Хэрэглээний хэл шинжлэлийн салбар, Ази судлалын салбар, Англи хэлний тэнхим, Англи хэлний академи, Санхүү, Багшийн хөгжлийн баг, Оюутны зөвлөл, ҮЭ-ийн хорооны үүсэл, хөгжил, үүрэг, зорилго, бүтэц бүрэлдэхүүн, хийж гүйцэтгэсэн болон хийж гүйцэтгэх үйл ажиллагаа болон багш, ажилтны танилцуулга, туурвисан ном, сурах бичиг, хамтын бүтээл, зохиогчийн эрхийн тухай мэдээллийг гадаад хэлний төв нээгдэж, улмаар тэнхим, сургууль байгуулах нөхцөл бүрдсэн, бүтэц өөрчлөгдөн шинэчлэгдсэн үеүдээр нь удирдлага, зохион байгуулалттай нь холбон өгүүлсэн. 352 нүүр бүхий номд одоо ажиллаж байгаа 96 багш, ажилтны танилцуулга болон 19 багш, ажилтны дурсамж, 12 оюутны дурсамж багтсан. 30 жилийн түүхийн номыг Ази судлалын салбарын багш Ч.Оюунгэрэл, Б.Сонинцэцэг, Н.Мөнхжаргал, захирал Ц.Энхбаатар нар эмхэтгэж, редакторлалаа. Ойн ном хэвлүүлэхэд ҮЭХороо 1 сая төгрөгийн санхүүгийн дэмжлэг үзүүлсэн.
3. 2022 оны 11 сард “ГХС 30 жил” видео контентыг ҮТС-ийн Дизайны салбартай хамтран бэлтгэж нийтийн хүртээл болгов.
4. Англи хэлний тэнхимийн багш нар инженерийн ангиудад орж буй бүх англи хэлний хичээлүүдийн стандарт төлөвлөгөөг багтаасан "ШУТИС-ийн Англи хэлний хичээлийн хөтөлбөр”-ийг монгол англи хэл дээр хэвлэн гаргасан нь ШУТИС-ийн Бүрэлдэхүүн сургуулиуд Боловсролын магадлан итгэмжлэлд орох болон лавлагаа хэлбэрээр ашиглах боломж бүрдүүлж өгсөн бөгөөд оюуны өмчийн эрхийг ГХС-ийн нэр дээр авч баталгаажуулалт хийжээ.

5. ШУТИС-ийн Гадаад хэлний сургуулийн 30 жилийн ойн хүрээнд 2022 оны 4 сард Англи хэлний тэнхимээс “English Language in My Career and Future” сэдэвт постер илтгэлийн уралдааныг 3 үе шаттай зохион байгуулж, төгсгөлийн шатанд ШУТИС, АШУҮИС, Дотоод хэргийн их сургууль, Их засаг их сургуулийн оюутнууд шалгарч англи хэлний мэдлэгээрээ өрсөлдлөө.
6. 2022 оны 2 сард ХХШС-ын эрхлэгч Ц.Цэцэгмаа, ахлах багш Ц.Мөнхдэлгэр нар ГХС-ийн бакалавр, магистрын оюутнуудад “Судалгааны ажил гүйцэтгэх арга зүй” сэдэвт лекц зохион байгуулж, ШУА ХЗХ-ийн эрдэмтдийн бүтээлийн үзэсгэлэн зохион байгуулсан.
7. ШУТИС-ийн магистрын оюутнуудад зориулан нэгдсэн шалгалтад бэлтгэх “English for Graduate Success” (Скотт, Ч.Золзаяа, Н.Алтанзул) гарын авлага, English for Power Engineering, (Н.Алтанзул А.Амарзаяа), English for Environmental Engineering (Н.Алтанзул А.Амарзаяа, Б.Бурмаа), English for Electrical Engineering (Н.Алтанзул А.Амарзаяа, М.Ганболд) бүтээлээр ГХС-ийн нэр дээр зохиогчийн эрх авсан.
8. А.Мөнгөнчимэг “Scrambling and Information Structure in Mongolian”, Б.Арваазана “Англи хэлний авианы дуудлагыг заахад комьпютерийн технолгои ашиглах асуудалд”, Ц.Цэцэгмаа “Фразеология в текстах А.С.Пушкина /состав и употребление/, Б.Дэлгэрмаа “Системийн шинжилгээний аргаар техник технологийн нэр томьёог судлах асуудалд”, Г.Уранчимэг “Эхийн түвшний үгийн сангийн холбох хэрэглүүр” нэг сэдэвт бүтээл тус тус туурвиж олны хүртээл болгосон.
9. АХТ-ийн багш нар "ШУТИС-ийн Англи хэлний хичээлийн хөтөлбөр", АХТ-ийн багш нар “English Curriculum”, А.Болормаа, П.Бямбажав нар “English for Management”, А.Ариунаа, Б.Бурмаа “English for Business Management”, Ж.Ганцэцэг, М.Отгонбаяр нар “English for Nutrition and Dietetic Students” Б.Сонинцэцэг, Н.Мөнхжаргал, С.Баасанжаргал нар "Монгол хэлний найруулга зүй", Т.Мөнхжаргал, Ц.Отгон, Б.Номиндалай “Техникийн солонгос хэл”, Ш.Галтмаа, Ц.Эрдэнэзаяа, Б.Ариунаа “Техникийн хятад хэл”, Б.Байгал, О.Индра нар "Англи хэлний хэл зүй үгсийн сан I", Б.Байгалмаа, Л.Амгалан "Англи хэлний хэл зүй үгсийн сан II", С.Уранбилэг, Э.Чимэдлхам "Англи хэлний хэл зүй үгсийн сан III", Ц.Цэцэгмаа, Д.Туяа нар "Англи хэлний хэл зүй үгсийн сан IV", Ц.Энхбаатар, О.Золзаяа “Шинжлэх ухаан технологийн англи хэл”, Л.Чойжилмаа “Хятад хэлний түгээмэл хэрэглэгддэг "LI HE" үгийн тайлбар толь”  зэрэг ШУТИС-ийн үндсэн сурах  бичиг, гарын авлага хэвлүүлэн сургалтад ашиглаж байна.

10.  2022 оны 11 сарын 10-нд ГХС-ийн 30 жилийн ойн хүрээнд Англи хэлний тэнхимийн профессор, багш нарын бүтээлийг таниулан сурталчлах зорилгоор ШУТТ номын сантай хамтран “Зохиогч уншигчийн уулзалт” зохион байгууллаа. Тэнхимийн эрхлэгч Ч.Золзаяа тэнхимийн сургалт болон хөтөлбөрийн онцлогийг, тэнхимийн дэд профессор доктор, дэд профессор Ж.Ганцэцэг өөрийн бүтээлийг, багш Б.Бурмаа, Л.Мөнхжаргал нар тэнхимийн багш нарын бүтээлийг тус тус танилцууллаа. Арга хэмжээний үеэр тус тэнхимийн ахмад багш, доктор, дэд профессор С.Дугармаад хүндэтгэл үзүүлж дурсамж гардуулсан ба ШУТТ номын сангийн захирал доктор, профессор Д.Оюунцэцэг Англи хэлний тэнхимд “Батламж” гардууллаа. 

Төгсөгчид, олон нийтэд чиглэсэн

1. 2022 оны 2 сарын 9-нд ШУТИС ФМ радиод ГХС-ийн Зөвлөх профессор Г.Томтогтох “ГХС-ийн түүх - дурсамж” ярилцлага өгөв.
2. 2022 оны 4 сарын 16-нд ГХС-ийн 30 жилийн ойн хүрээнд “Эрүүл мэнд эрхэм баян - ГХС 30” уулын алхалтыг АСС зохион байгуулж Богд уулын Соёмбот толгойд амралтын нэг өдрийг дурсамжтай сайхан өнгөрүүлэв. 

3. ШУТИС-ийн Гадаад хэлний сургуулийн 30 жилийн ойг угтан Төгсөгчдийн нэрэмжит волейболын тэмцээнийг 2022 оны 05-р сарын 7-ны өдөр зохион байгуулав. Тус тэмцээнийг 2002 төгсөгчид ивээн тэтгэж, хамтран зохион байгуулсан төдийгүй англи, япон хэлний төгсөгчдийн зүгээс сургуулийнхаа хөгжил, үйл ажиллагаа, сургалт судалгаанд зориулж мөнгөн хандив өргөсөн байна. “2002 төгсөгчдийн нэрэмжит волейболын тэмцээн”-д 1-р байрыг “Солонгос хэлний төгсөгчдийн Korean Juniors” баг, 2-р байрыг “Англи-орос хэлний 2001, 2009, 2022 оны төгсөгчдийн холимог баг”, 3-р байрыг “Англи-орос хэлний 2003 оны төгсөгчид”, тусгай байрыг “Хятад хэлний төгсөгчдийн баг” тус тус эзэллээ.

4. MUST, Science 94.1 FM нэвтрүүлгийн англи хэлний цуврал хичээлийг Англи хэлний тэнхимийн мэргэжилтэн багш Скотт, ахлах багш Н.Алтанзул, багш Б.Энхзул, А.Амарзаяа, Э.Сауруул. Д.Одончимэг, М.Нямдолгор нар амжилттай явууллаа.
5. 2021-2022 оны хаврын улиралд ШУТИС-ийн бакалаврын оюутанд зориулсан “Global leadership”, “Extensive Reading” профессор багш оюутанд зориулсан хөтөлбөрийг тус тус хэрэгжүүлсэн. Тус төсөл “Global Leadership” хөтөлбөрт 15 оюутан, “Extensive Reading” хөтөлбөрт 72 оюутан, ШУТИС-ийн бүрэлдэхүүн сургуулийн 27 багш амжилттай хамрагдан англи хэлний ур чадвараа хөгжүүлсэн.
6. 2022 оны 1 сард ХХШС-ын ахлах багш Б.Байгалмаа, багш Я.Оюунцэцэг нар Нийгмийн хариуцлагын хүрээнд ШУТИС-ийн ажилчдын 180 айл Эрдэм хотхоны багш ажилчдын хүүхдүүдэд Англи хэлний сургалт үнэ төлбөргүй зохион байгуулсан.
7. Төгсөгч, хандивлагч байгууллагуудын хандиваар 2-р байрны 227, 228, 325, 326, 327, 612 тоот ангиудад смарт зурагт, техник хэрэгсэл суурилуулж, сургалтын орчныг сайжруулсан.
8. 2021-2022 оны хичээлийн жилд Карьер хөгжлийн хөтөлбөр боловсруулан ба тус хөтөлбөрийн хүрээнд гадны байгууллагын мэргэжилтэн, ШУТИС, ГХС-ийн төгсөгчдөөр 13 удаагийн үйл ажиллагааг зохион байгуулж, давхардсан тоогоор 398 оюутан, 47 багш хамрагдсан.
9. ХХШС-аас Англи хэлний сургалт явуулдаг төрийн болон хувийн хэвшлийн их, дээд сургуулиудын англи хэлний мэргэжлийн ангийн оюутнуудын “Англи хэлний улсын олимпиад” 3 үе шаттайгаар зохион байгуулсан.
10. Хичээлийн жилийн туршид ГХС-ийн вэб хуудсанд “ГХС-ийн Төгсөгчдөө алдаршуулах” булан хөтөлж, 60 гаруй шилдэг төгсөгчдийн танилцуулга гаргав.
11. ХХШС-ын Ц.Цэцэгмаа Ц.Цэцэгмаа, C.Бархас, Б.Байгалмаа, Д.Гаамаа нар “Эрдэм ном эрхэм баян” аян зохион байгуулж: Нийслэлийн БЗД-ийн 79-р сургууль, Нарны инээмсэглэл өдөр өнжүүлэх сургалтын төв, Сүхбаатар аймгийн Мөнххаан сумын ЕБС-д 44 нэр төрлийн 135 ширхэг ном, АСС-ын Г.Томтогтох “Монгол хэл шинжлэлийн цуврал 15 боть” ГХС-д, Р.Бигэрмаа 2 бүтээл ГХС-д,  ШУТТНС-д “Техникийн солонгос хэл”, “Техникийн хятад хэл” үндсэн сурах бичиг 30 ш, Ц.Эрдэнэзаяа “МНТ-ны тийн ялгалын ай” цахим санд, Б.Дэлгэрмаа “Системийн шинжилгээний аргаар нэр томьёог судлах нь” 2022 нэг сэдэвт бүтээл цахим болон цаасан хэлбэрээр тус тус хандивлав. 
12. 30 жилийн ойд зориулж,  Хамрын хийд рүү багш, ажилтны аялал зохион байгуулж, 23 багш, ажилтны нэг талын зардалд 451300 төгрөгийг ГХС-ийн ҮЭ-ээс гаргасан.
13. Монголын багш нарын баяр, ГХС байгуулагдсаны 30 жилийн ойн  баярыг тохиолдуулан Хөдөлмөрийн гавьяаны улаан тугийн одонгоор Б.Байгалмаа; Алтан гадас одонгоор Л.Чойжилмаа, Г.Уранчимэг, С.Бархас; Боловсролын тэргүүний ажилтан цол, тэмдгээр Б.Эрдэнэчулуун, С.Уранбилэг, Б.Дэлгэрмаа, А.Амарзаяа; БШУЯ-ны Жуух бичгээр Б.Энхзул, Г.Ариунбямба, Ц.Оюунтунгалаг, М.Даваажав; ШУТИС-ийн Ректорын нэрэмжит шагналаар Н.Мэнд; ШУТИС-ийн Эрдмийн зөвлөлийн шагналаар Ц.Цэцэгмаа; МБШУ-ны ҮЭ-ийн холбооны “Хүндэт тэмдэг”-ээр С.Оюундэлгэр, А.Амарзаяа, С.Сэржмядаг, Ү.Түмэндэмбэрэл, Ж.Одбаяр; МБШУ-ны ҮЭ-ийн холбооны “Хүндэт өргөмжлөл”-өөр Т.Мөнхжаргал, Д.Одончимэг, Т.Энхцэцэг нар тус тус шагнуулж, улс эх орон, төрөлх сургуулиараа хөдөлмөрөө үнэлүүлсэн байна.

Мэдээ бэлдсэн

Н.Мэнд /ГХС ЭНБД/