ШУТИС-ийн 2009/2010 ОНЫ ХИЧЭЭЛИЙН ЖИЛИЙН ЭЛСЭЛТИЙН ТАЙЛАН

БСШУЯ-аас батлан гаргасан “Оюутан элсүүлэх үлгэрчилсэн журам”-ыг үндэслэн, Монгол Улсын Шинжлэх Ухаан Технологийн Их Сургуульд оюутан элсүүлэх журмыг боловсруулан гаргаж, (Зууны мэдээ сонины 2009 оны 02 сарын 14-ний өдрийн дугаар, ШУТИС-ийн web хуудас) олны хүртээл болголоо.  Боловсролын үнэлгээний төвөөс элсэлтийн ерөнхий шалгалтыг нийт элсэгчдээс авч байгаатай холбоотойгоор, ШУТИС-д элсэн суралцах хүсэлт гаргасан элсэгчдийн өргөдлийг online хэлбэрээр Голомт, Худалдаа хөгжлийн банкуудтай гэрээ хийж банкны карт ашиглан хүлээн авч бүртгэх болоод элсэгчдийн онооны жагсаалтыг тусгай програм хангамжийн тусламжтайгаар гарган, болзол хангасан элсэгчдийн цаашид суралцах мэргэжлийн сонголтыг хийлгэв. Элсэлтийн үйл ажиллагааг Элсэлтийн төв комисс удирдлагаар ханган зохион байгуулсан бөгөөд элсэлтийн комисст бүрэлдэхүүн сургуулиас нийтдээ 61 багш ажилтан оролцон ажиллав. Элсэлтийн комиссыг элсэгчдэд тараах танилцуулга хэвлэх, хүргэх, элсэгчдийн өргөдлийг хүлээн авч бүртгэх, элсэгчдийн бүртгэлийн бааз бүрдүүлэлт, онооны жагсаалт гаргах болон шаардлагатай дэд програм хангамжийг боловсруулах гэсэн ажлын хэсгүүд болгон зохион байгуулж ажиллуулав.

Элсэлтийн ажлын график дараахь хуваарийн дагуу явагдав. Үүнд:

БҮРТГЭЛ:                               2009 оны 06.26- 07.05-ны өдрүүдэд 24 цагийн турш Шинжлэх Ухаан Технологийн Их Сургуулийн элсэгчийн вэб хаягаар бүртгэв.

ХАР ЗУРГИЙН ШАЛГАЛТ:    2009 оны 07 сарын 6-ны өдөр 10.00 цагаас зохион байгуулагдав

ОНООНЫ ЖАГСААЛТ:         2009 оны 07 сарын 7-ны өдөр 12.00 цагт гаргасан.

ХУВААРЬ СОНГОЛТ:            2009 оны 07.08- 07.10-ны өдрүүдэд

2009/10 оны хичээлийн жилд БСШУЯ-аас батлагдаж ирсэн хяналтын тооны дагуу ШУТИС-ийн бүрэлдэхүүн болон харьяа сургуулиудад нийт 146 мэргэжлээр 4429 оюутан I ээлжийн сургалтаар, 1276 оюутан II ээлжийн сургалтаар шинээр элсүүлэн суралцууллаа.

ШУТИС-ийн бүрэлдэхүүн 4 сургуулийн гүнзгийрүүлсэн сургалттай ангийг төгсөгчдөөс “ШУТИС-ийн элсэлтийн журам”-ын 4.12-д заасан болзол хангасан 213 төгсөгчдөд бакалаврын сургалтаар шууд элсүүлэн сурах эрх олгон хуваарь сонголт хийлгэв.

Сургалтын төлбөрөө бүрэн төлсөн, суралцах гэрээ байгуулах эрхийн бичиг авсан хүмүүсийг 2009 оны 08 сарын 13-24-ны өдрүүдэд бүрэлдэхүүн сургуулиуд ын сургалтын албад дээр бүртгэл явууллаа.

ШУТИС нь Боловсролын үнэлгээний төвөөс зохион байгуулсан элсэлтийн ерөнхий шалгалтанд дүүргийн шалгалтын төв болсонтой холбогдон шалгалт зохион байгуулалтын бүх асуудлыг хариуцан ажилласан бөгөөд энэхүү шалгалтын ажиллагааг ШУТИС-ийн зүгээс томилогдсон ажлын хэсэг 2009 оны 06 сарын 4,5,6 –ны өдрүүдэд зохион байгуулав.

Элсэлтийн үйл ажиллагаатай холбогдсон санхүүгийн бүх үйл ажиллагааг Элсэлтийн комиссын дарга (сургалтын проректор) болон орлогч дарга нарын хяналтан доор СЭЗГ хариуцан ажиллав.