ОЮУТНЫ ШИЛЖИЛТ, ХӨДӨЛГӨӨНИЙ ЖУРАМ

НЭГ. НИЙТЛЭГ ҮНДЭСЛЭЛ

ШУТИС-ийн оюутанд чөлөө олгох, гадаад, дотоодын их, дээд сургуулиудаас оюутан шилжин ирж суралцах, мөн ШУТИС-ийн бүрэлдэхүүн сургууль хооронд шилжүүлэн суралцуулах,  ШУТИС-ийн оюутныг сургуулиас чөлөөлөх зэрэг үйл ажиллагааг энэхүү журмаар зохицуулна.

ХОЁР. ОЮУТАНД ЧӨЛӨӨ ОЛГОХ

• 2.1. Сургалтын үйл явцыг тодорхой хүндэтгэн үзэх шалтгааны улмаас цаашид үргэжлүүлэн суралцах боломжгүй болсон оюутан, нэг улирлын эсвэл нэг хичээлийн жилийн хугацааны чөлөө авч болно.
• 2.2. Чөлөө авах хүсэлтэй оюутан өргөдөл гаргаж, Сургалтын албанд хандана.
• 2.3. Өргөдлийн дагуу Сургалтын алба тухайн оюутны нийт цуглуулсан кредит, хуримтлуулсан үнэлгээний голч дүн, тухайн улирлын хичээл сонголтын нийт кредитийг тус тус баталгаажуулан гаргаж өгнө. Мөн оюутны төрийн сангийн зээл, буцалтгүй тусламжаар суралцаж байгаа эсэхийг тодорхойлно. Оюутанд тойрох хуудас олгогдоно.
• 2.4. Оюутан нь Сургалтын албанаас гаргаж өгсөн баримт бичгийг өөрийн өргөдлийн хамт мэргэжлийн харъяа профессорт танилцуулан зөвшөөрөл авна.
• 2.5. Профессороос оюутанд чөлөө олгохоор шийдвэрлэсэн тохиолдолд сургуулийн санхүүгээс хавсралтанд заасан "Чөлөө авах хүсэлтэй оюутны сургалтын төлбөрийн тооцоо хийх аргачлал"-ын дагуу, Сургалтын албанаас тавьсан он, сар, өдрийг (сургалтын нэгдсэн хуанли дахь хэд дэх долоо хоног болох) үндэслэн тооцоог хийнэ.
• 2.6. Оюутан тойрох хуудсаа бүрдүүлж дууссаны дараа захирлын туслахад өгөх бөгөөд уг хуудсан дахь сургуулийн санхүүгийн "Тооцоогүй" гэсэн тэмдэглэгээний он сар өдрийг үндэслэн, оюутанд чөлөө олгосон тухай Захирлын тушаал гарна.
• 2.7. Захирлын тушаалд оюутанд чөлөө олгогдсон хичээлийн жил, улирал, сар, өдөр төдийгүй тухайн оюутны чөлөөнөөс эргэн ирж үргэжлүүлэн суралцах хичээлийн жил ба улирлыг нь тодорхой заасан байна.
• 2.8. Оюутан суралцах хугацааны турш нийт 3 хүртэл жилийн чөлөө авч болно. Гэхдээ оюутан нь хоёр чөлөөний хооронд намар, хаврын бүтэн 2 улиралд хэвийн ачаалалтайгаар суралцсан байх шаардлагатай. Оюутан чөлөөг сунгах хүсэлт гаргасан тохиолдолд нийт чөлөөг нэг чөлөөнд тооцно.
• 2.9. Чөлөөнөөс ирж байгаа оюутан нь улирлын эхэнд сургалтын нэгдсэн хуанлийн "Хичээл сонголт 2" явагдаж дуусахаас өмнө сургалтын албанд хандаж, тухайн улиралд суралцах хичээлүүдээ сонгоно. Оюутны чөлөөнөөс ирж, үргэлжлүүлэн суралцаж байгаа тухай захирлын тушаал гарна.

ГУРАВ. ОЮУТНЫ ШИЛЖИЛТ

• 3.1. Гадаадын болон дотоодын их, дээд сургуулиудаас ШУТИС-д шилжин суралцах хүсэлтэй оюутан бүрэлдэхүүн сургуулийн сургалт хариуцсан дэд захиралд хандана.
• 3.2. Оюутны хүсэлт гаргасан хугацаа сургалтын нэгдсэн хуанлийн "Хичээл сонголт 2" явагдаж өнгөрснөөс хойш, мөн түүнчлэн шилжин суралцахаар хүсэлт гаргасан мэргэжлийн анги дүүргэлт бүрдсэн тохиолдолд дэд захирал шууд татгалзсан хариу өгч болно.
• 3.3. Шилжин суралцах хүсэлт гаргаж буй оюутан доорх баримт бичгийг бүрдүүлсэн байна. Үүнд:

• хувийн өргөдөл
• иргэний үнэмлэх
• ерөнхий шалгалтын батламж
• анх элсэн орсон сургуулийн томилолт (эх хувь)
• оюутнаар батлагдсан тухай шилжүүлж буй сургуулийн ректорын болон захирлын тушаалын хуулбар
• гадаадаас шилжин ирж буй оюутан нь БСШУЯ-аас ШУТИС-д шилжүүлэн авахыг зөвшөөрсөн албан бичиг (хувийн зардлаар суралцсан оюутанд хамаарахгүй)
• суралцаж байсан сургуулийн тодорхойлолт (захирлын гарын үсэг бүхий албан бичиг)
• сурлагын дүнгийн баталгаажуулсан жагсаалт
• хувийн хэрэг

• 3.4. Дэд захирал нь захиралд танилцуулан зөвшилцсөний үндсэн дээр хүсэлт гаргасан оюутанд шилжин суралцах гэж буй мэргэжлээс хамааран харъяалах профессорын багийн ахлагчтай уулзахыг зөвлөнө.
• 3.5. Профессорын багийн ахлагч нь оюутныг шилжин суралцахыг зөвшөөрсөн тохиолдолд Сургалтын бодлого зохицуулалтын газарт дэд захирал тухайн оюутны материалыг хүргэнэ. Оюутныг шилжүүлэн суралцуулах тухай эцсийн шийдвэрийг Сургалтын проректор, сургалтын бодлого зохицуулалтын газрын дарга нар материалтай нь танилцсаны дараа хамтран гаргана.
• 3.6. Шилжих зөвшөөрөл олгогдсон оюутантай дэд захирал "Сургалтын гэрээ" байгуулна. Тухайн мэргэжлийг хариуцан ажиллаж байгаа профессор нь оюутны сурлагын дүнгийн жагсаалтыг үндэслэн, өмнө сургуульд үзэж судалсан хичээлүүдээс агуулгын хувьд дүйцүүлэн тооцох хичээл байгаа эсэхийг нягтлан, өөрийн сургуулийн сургалтын албаар уламжлуулан, ШУТИС-ийн кредит дүйцүүлэх комисст санал оруулна.
• 3.7. ШУТИС-ийн кредит дүйцүүлэх комисс нь оюутны шилжин ирсэн сургуулийн хүлээн зөвшөөрөгдсөн болон магадлан итгэмжлэгдсэн байдал болон боловсролын ямар зэрэгтэй мэргэжилтэн бэлтгэн гаргадаг зэргээс хамааран хэд хүртэл кредитийг болон ямар үнэлгээг оюутанд тооцож болохыг шийдвэрлэнэ.
• 3.8. Сургалтын бодлого зохицуулалтын газрын тодорхойлолтыг үндэслэн, тухайн оюутны шилжин суралцах болсон тухай ШУТИС-ийн Ректорын тушаал гарна.
• 3.9. Профессорын багийн ахлагч нь оюутныг зөвлөх багштай нь танилцуулна.
• 3.10. "Сургалтын гэрээ" байгуулсан оюутан сургалтын албанд хандсанаар, оюутны бүртгэл хийгдэж код олгогдоно. Оюутан нь тухайн улиралд суралцах хичээлээ сонгоно.
• 3.11. Оюутан сургалтын төлбөрөө төлсний дараа сургалтын албанаас үйлчилгээний карт авснаар сургалтын үйл явцад оролцох эрхтэй болно.
• 3.12. ШУТИС-ийн бүрэлдэхүүн сургуулиудын хооронд шилжих хүсэлтийг дараах шаардлагыг хангасан оюутан профессорын багийн ахлагчид гаргана. Үүнд:
• Анх элсэн орсон мэргэжлээр нэг улирал буюу түүнээс дээш хугацаагаар тасралтгүй суралцсан
• суралцсан хугацааны нийт хуримтлуулсан үнэлгээний голч дүн нь 2.00-оос доошгүй байх
• 3.13. ШУТИС-ийн бүрэлдэхүүн сургуулиудын хооронд шилжих оюутны хүсэлтийг Сургалтын бодлого зохицуулалтын газрын даргын зөвшөөрөлтэйгээр бүрэлдэхүүн сургуулиудын захирлууд шийдвэрлэх бөгөөд сургуулийн захирлын тушаалаар баталгаажуулна.
• 3.14. ШУТИС-ийн бүрэлдэхүүн сургуулиудын хооронд шилжих болсон оюутан нь суралцаж байсан сургуульдаа сургалтын төлбөрөөс гадна 15 кредитийн төлбөрийг төлж, тухайн сургуулийн сургалтын үйл ажиллагааг хэвийн үргэлжлүүлэн явуулах нөхцөлийг хангана.
• 3.15. ШУТИС-ийн бүрэлдэхүүн сургууль дотор нэг мэргэжлээс нөгөөд шилжих тохиолдолд профессорууд харилцан тохиролцсоны эцэст сургуулийн зөвлөлөөр асуудлыг оруулж шийдвэрлэн, захирлын тушаалаар баталгаажуулна.

Нэмэлт тайлбар

• 3.14.1 ШУТИС-ийн кредит дүйцүүлэн тооцох комисс нь гадаад, дотоодын их сургуулиас шилжин ирсэн оюутны хувьд өмнөх сургуульд үзэж судалсан хичээлийн кредит болон үнэлгээг бүрэн тооцож, харин магадлан итгэмжлэгдсэн дотоодын дээд сургууль, коллежуудаас шилжин ирж буй оюутны хувьд хичээлийн кредитийг бүрэн тооцож, үнэлгээг нь нэг шат бууруулан хөрвүүлэн тавина.
• 3.14.2 Тухайн мэргэжлээр төрийн буцалтгүй тусламж, зээлээр суралцаж буй оюутан нь шилжин суралцсан тохиолдолд сургалтын төлбөрийг төр хариуцахгүй бөгөөд төрийн сантай хийсэн гэрээ хүчингүй болж оюутан хувийн зардлаар цаашид суралцана.
• 3.14.3 Магадлан итгэмжлэгдээгүй дээд сургууль, коллежиудаас ШУТИС-д оюутан шилжүүлэн суралцахгүй.

ДӨРӨВ. ОЮУТНЫГ СУРГУУЛИАС ХАСАХ

• 4.1. Сургуулийн захиргаанаас дараах тохиолдолд оюутантай байгуулсан "Сургалтын гэрээ"-г цуцалж, сургуулиас хасна. Үүнд:
• ШУТИС-ийн дүрэм, дотоод журмыг зөрчсөн бол
• "Сургалтын гэрээ"-г зөрчсөн бол
• Захирлын тушаалд заасан хугацаанд чөлөөнөөс ирж, үргэлжлүүлэн суралцаагүй тохиолдолд

• Сургалтын үйл явцыг хаяж, нэг улирлын турш сураггүй алга болсон бол

• Шүүхээр гэм буруутай нь тогтоогдоод ял эдлэхээр заагдсан бол
• Оюутан өөрөө сургуулиас гарахыг хүссэн тохиолдолд зэрэг болно.
• Оюутны нэр анхааруулгын хуудсанд 3 улирал дараалан бичигдсэн тохиолдолд сурлагаар тэнцээгүй гэж үзэж сургуулиас хасна. Тодруулбал, улирлын үнэлгээний голч дүн 0.7 хүрээгүй тохиолдолд оюутны нэр анхааруулгын хуудсанд бичигдэх болно.